Jemi mësuar ta shikojmë sensuale dhe provokuese, ku nuk na i kursen shkrepjet sensuale. Flasim për Oriola Marashin, që vijon të mbetet ndër modelet më të mira në vendin tonë.
Prej kohësh ajo ka zgjedhur që ta ushtrojë profesionin e saj edhe jashtë vendit, ku edhe është bërë imazh i “Guess”. Kontratat e reja kanë bërë që gjithnjë e më shpesh ajo të jetë jashtë vendin. Ndaj në momentet kur gjendet në Tiranë, Ori gjen pak kohë edhe për të mbyllur angazhimet si kushdo nga ne.
Paparaci ynë ka mundur ta fotografojë modelen teksa pret radhën në bankë. E veshur sportive, Oriola duket krejt ndryshe nga shkëlqimi që jemi mësuar ta shikojmë në “Instagram”-in e saj. Modelja ishte e pagrimuar, teksa duke pritur në radhë fliste edhe në telefon.
Ndonëse ishte përpjekur ta ‘kamuflonte’ veten me një kapele, por e pamundur të mos dallohej se në fakt personi që po priste në radhë ishte pikërisht modelja e njohur. Së fundmi imazhi i Oriolës është shfaqur në një billboard në Venecia. Kjo ngjarje ka shkaktuar emocion te modelja, e cila në një jaht ka pozuar me imazhin e saj në sfond.
“12 orë në Venecia. O Zoti im, nuk mund ta përshkruaj ndjenjën që kam kur shoh veten në këto billborde të mëdha. Gjithçka që më duhet të them është se puna e vështirë shpërblehet, por duhet të jesh shumë me fat për të kapur momentin”, u shpreh Marashi.
“Jam shumë e lumtur që pata mundësinë të provoj veten se gjithçka është e mundur kur e ëndërron! Faleminderit Zot, faleminderit”, shkruan Oriola Marashi.
Modelja i dha fund kohë më parë lidhjes së konsoliduar që kishte me futbollistin Eros Grezda. Pas kësaj romance, Oriola nuk ka preferuar të japë për publikun detaje nga jeta e saj personale.
Megjithatë, ajo vijon të jetë aktive në rrjetet sociale, ku merr edhe vëmendje të madhe. Së fundmi ajo ka postuar një video në profilin e saj në TikTok, ku i këndon “dashurisë së vjetër”.
“Ti je dashuri dhe pozitivitet. Ty vetëm të të shikojë njeriu ndihet mirë, lëre të rrijë me ty e të bëjë muhabet apo ndonjë gjë. Ah dashuri e vjetër, t’kisha lënë n’dorë t’dikujt tjetër, edhe pse të lashë dikur, të të harroj nuk munda kurrë”, thotë Oriola gjatë videos, e cila dashur padashur mund të lidhet edhe me romancën e saj të fundit që ka pasur publike.
Në fillimet e tyre, lidhja mes modeles dhe futbollistit shkonte mirë dhe herë pas here i shihnim bashkë në “Instagram”-et e njëri-tjetrit e madje në media qarkulloi lajmi se lidhja kishte kaluar në tjetër nivel dhe çifti ishte fejuar. Por Oriola dhe Eros i dhanë fund lidhjes, vitin e kaluar.
Dyshimet për një krisje të mundshme të marrëdhënies të tyre lindën, pasi ata nuk ndiqeshin më njëri-tjetrin në rrjetet sociale, në një kohë kur ishin bërë shumë aktivë me postimet nga lidhja e tyre. Por miqtë treguan se çifti ishin ndarë, duke prishur planin që kishin bërë për martesë.
Lidhja e dashurisë mes Oriola Marashit dhe Eros Grezdës ka qenë gjithmonë në qendër të vëmendjes së mediave rozë. Vetë futbollisti ka treguar se gjithmonë e ka bezdisur ky fakt pasi flitej për lidhjen e tij dhe jo karrierën.
“U bë publike dhe më ka bezdisur se nuk është në rregull kur një futbollist del gjithmonë në portale jo për tema futbollistike, por për jetën private”, u shpreh Eros.
Sot, futbollisti ka gjetur sërish dashurinë pranë një tjetër modeleje. Madje, dyshja prej pak kohësh është bërë edhe çift i një fëmije.
